ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်း

အကြောင်းအရာဖော်ပြချက်

အခြေခံအဆောက်အအုံများအား ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်း ဆိုသည်မှာ ရှိပြီးသား အစိုးရပိုင် အဆောက်အအုံ၊ မြေများကို ပုဂ္ဂလိကကဏ္ဍသို့ ရောင်းချခြင်း သို့မဟုတ် ငှားရမ်းခြင်းဖြင့် ရရှိသော ရန်ပုံငွေအားလုံးကို အခြေခံအဆောက်အအုံအသစ်တွင် ပြန်လည်ရင်းနှီးမြှုပ်နှံခြင်းဖြင့် ဝင်ငွေရှာခြင်းဖြစ်သည်။ အစိုးရသည် ပြည်သူပိုင်ပစ္စည်းတစ်ခုအား တန်ဖိုးတစ်ခုဖြင့် ပုဂ္ဂလိကအဖွဲ့အစည်းတစ်ခုသို့ ရောင်းချ (သို့မဟုတ် ငှားရမ်း) ပြီးနောက် ရရှိသောဝင်ငွေများကို အနာဂတ်ရင်းနှီးမြှုပ်နှံမှုအတွက် ရန်ပုံငွေထောက်ပံ့ပေးရန် အသုံးပြုသည်။ အစိုးရသည် မလိုအပ်တော့သော ပိုင်ဆိုင်ပစ္စည်းကို ရောင်းချခြင်း၊ ၎င်း၏ လက်ရှိအရင်းအနှီး တန်ဖိုးကို အခွင့်ကောင်းယူရန် ပိုင်ဆိုင်ပစ္စည်းတစ်ခုကို ရောင်းချပြီးနောက် အများပြည်သူ အသုံးပြုရန်အတွက် ပြန်လည်ငှားရမ်းခြင်း သို့မဟုတ် ပုဂ္ဂလိကကဏ္ဍ ဖွံ့ဖြိုးတိုးတက်ရေး အစီအစဉ်တစ်ခုဖြင့် ကူညီရန် ပိုင်ဆိုင်ပစ္စည်းလဲလှယ်ခြင်း သို့မဟုတ် မျှဝေမှု အစီအစဉ်ကို လုပ်ဆောင်ခြင်းများ ပြုလုပ်နိုင်ပါသည်။ ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်းသည် လက်ရှိ အခြေခံအဆောက်အအုံများနှင့် ဝန်ဆောင်မှုများ ပေးခြင်းကို ထိန်းသိမ်းထားရှိချိန် သို့မဟုတ် တိုးတက်ကောင်းမွန်အောင်ဆောင်ရွက်ရန် အလားအလာရှိနေချိန်တွင် အစိုးရကြွေးမြီကို ထပ်တိုးစေခြင်းမရှိဘဲ အသစ်လိုအပ်သော အခြေခံအဆောက်အအုံများ ပံ့ပိုးပေးနိုင်ရန် အခွင့်အလမ်းကို ပေးပါသည်။

အခြေအနေများကို ဖန်တီးခြင်းနှင့် အဓိက ထည့်သွင်းစဉ်းစားစရာများ

• ရရှိလာသော ဝင်ငွေများကို အသုံးချခြင်းအတွက်ခိုင်မာသော နည်းလမ်းများ သို့မဟုတ် လမ်းညွှန်ချက်များကို ချမှတ်ရန် လိုအပ်ပါသည်။ . ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်းမှ ရရှိလာသောဝင်ငွေများကို ထိထိရောက်ရောက် အသုံးချကြောင်း သေချာစေရန်အတွက် ပြန်လည်ရင်းနှီးမြှုပ်နှံမှု သို့မဟုတ် အခြေခံအဆောက်အအုံ ပိုင်ဆိုင်ပစ္စည်းအသစ်များကို ရန်ပုံငွေထောက်ပံ့မှုများအတွက် ရှင်းလင်းသောနည်းလမ်းများ သို့မဟုတ် လမ်းညွှန်ချက်များကို ချမှတ်ရန် လိုအပ်ပါမည်။ ဒေသဆိုင်ရာ အာဏာပိုင်များသည် ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်းမှ ရရှိလာသောငွေများကို ၎င်းတို့၏ ကိုယ်ပိုင် အတိုင်းအတာနယ်ပယ် အောက်တွင် အခြေခံအဆောက်အအုံအတွက် ပြန်လည်ရင်းနှီးမြှုပ်နှံရန်အတွက် ဆက်လက်ထိန်းသိမ်းထားရန် ရွေးချယ်နိုင်သည်၊ သို့မဟုတ် ရရှိလာသောငွေများကို အစိုးရဌာနများအကြား မျှဝေထားသော ရန်ပုံငွေတစ်ခုထံသို့ ခွဲဝေပေးနိုင်သည်။ နောက်ပုံစံတွင် ရေရှည် တန်ဖိုးဖန်တီးမှု သေချာစေရန် ထောက်ပံ့ငွေကို အသုံးပြုခြင်းသည် ပွင့်လင်းမြင်သာမှုနှင့် တာဝန်ခံမှုရှိရန် လိုအပ်ပါသည်။
• အစိုးရနှင့် ပုဂ္ဂလိကမှ သက်ဆိုင်သူများ၏တာဝန်ယူမှုနှင့် အလုပ်တာဝန်များကို ဖော်ပြထားသည့် ရှင်းလင်းသော စီမံကိန်း သဘောတူညချက်များ။
  ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်းဆိုင်ရာ လွှဲပြောင်းမှုများတွင် လုပ်ငန်းလည်ပတ်ရန်၊ ထိန်းသိမ်းရန်နှင့် တစ်ခါတစ်ရံတွင် ပြန်လည်ဖွံ့ဖြိုးရေးဆောင်ရွက်ရန် နှင့်/သို့မဟုတ် တိုးချဲ့ရန်အတွက် ပုဂ္ဂလိက မိတ်ဖက်တစ်ဦးထံ ပိုင်ဆိုင်မှုတစ်ခုအား ကာလရှည် လုပ်ပိုင်ခွင့်ပေးခြင်း သို့မဟုတ် ငှားရမ်းခြင်းတို့ ပါဝင်နိုင်ပါသည်။ အခြားသက်ဆိုင်ရာ စီမံကိန်းစီမံခန့်ခွဲမှု နယ်ပယ်များအနက်မှ အစီရင်ခံခြင်းဆိုင်ရာ လိုအပ်ချက်များ၊ စွမ်းဆောင်ရည် စောင့်ကြည့်ခြင်း လုပ်ငန်းစဉ်များ၊ အငြင်းပွားမှုဖြေရှင်းရေး လုပ်ထုံးလုပ်နည်းများနှင့် ပြန်လည်အပ်နှံရေး လုပ်ထုံးလုပ်နည်းများကို သတ်မှတ်ပေးသည့် ရှင်းလင်းသော စီမံကိန်းသဘောတူညီချက်သည် ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်း စာချုပ်စာတမ်းများကို အောင်မြင်စွာ အသုံးပြုရန်အတွက် အရေးကြီးပါသည်။
• စွမ်းဆောင်ရည် စံနှုန်းများနှင့်ပြန်လည်အပ်နှံရေးဆိုင်ရာ တာဝန်များကို ကနဦးအဆင့်၌ပင် သတ်မှတ်ရန် လိုအပ်ပါသည်။ လုပ်ပိုင်ခွင့် သို့မဟုတ် ငှားရမ်း သက်တမ်းပါဝင်သည့် ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်းဆိုင်ရာ လွှဲပြောင်းပေးအပ်ခြင်းများတွင် ပုဂ္ဂလိကကဏ္ဍမှ ထွက်ခွာရမည့်အချိန်၌ ပုဂ္ဂလိကကဏ္ဍနှင့် ပါဝင်ပတ်သက်သည့် အာဏာပိုင် နှစ်ခုစလုံးမှ ဖြည့်ဆည်းရမည့် ထွက်ခွာချိန်တာဝန်များ ပါရှိသင့်ပါသည်။ စီမံကိန်း၏အစတွင် ဤတာဝန်ဝတ္တရားများကို ဆုံးဖြတ်ရာ၌ ပိုင်ဆိုင်မှု၏ ရေရှည်တည်တံ့မှု၊ ဝန်ဆောင်မှုများ ဆက်လက်ပေးနိုင်မှုနှင့် ဝန်ဆောင်မှုစံနှုန်းများအား ထိန်းသိမ်းမှုတို့ကို ထည့်သွင်းစဉ်းစားရန် လိုအပ်ပါသည်။ လွှဲပြောင်းပေးမှုဆိုင်ရာ တာဝန်ဝတ္တရားများတွင် အမှန်တကယ်ရှိသည့် အရည်အသွေး အကဲဖြတ်ခြင်းနှင့် လွှဲပြောင်းပေးရာတွင် အကောင်းဆုံးမဟုတ်သော ပိုင်ဆိုင်ပစ္စည်း အရည်အသွေးအတွက် ပေးဆောင်ရမည့် ပြုပြင်စရိတ်များကို ဆုံးဖြတ်ရန် လုပ်ထုံးလုပ်နည်းများကိုလည်း သတ်မှတ်ရန် လိုအပ်ပါသည်။ ဥပမာအားဖြင့် လွှဲပြောင်းမှုအတွက် စစ်ဆေးမှုများပြုလုပ်ရန် သီးခြားလွတ်လပ်သော လုပ်ငန်းစဉ်တစ်ခု လိုအပ်နိုင်ပါသည်။
• ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်း အစီအစဉ်ကိုမစတင်မီ အများပြည်သူအပေါ် လွှမ်းမိုးမှုရှိသောအဖွဲ့များနှင့် ပုဂ္ဂလိကကဏ္ဍများ၏ ထိတွေ့ဆက်ဆံမှုသည်အရေးကြီးပါသည် ပိုင်ဆိုင်မှုများကို ပုဂ္ဂလိကပိုင်ပြုလုပ်ခြင်းအပေါ် သဘောထားအမြင်များသည် နိုင်ငံများနှင့် ကဏ္ဍများအလိုက် ကွဲပြားကြပြီး အစိုးရက ပုဂ္ဂလိကအဖွဲ့အစည်းများသို့ ပြည်သူပိုင်ပစ္စည်းများကို ရောင်းချခြင်း သို့မဟုတ် ငှားရမ်းခြင်းသည် အခြားကိစ္စရပ်များအနက် အလုပ်အကိုင်ဆုံးရှုံးခြင်း သို့မဟုတ် အများပြည်သူ လုံခြုံရေးဆိုင်ရာ စိုးရိမ်မှုများကဲ့သို့သော ပြဿနာများကြောင့် အများပြည်သူ၏ အပြုသဘောမဆောင်သော တုံ့ပြန်မှုများကို ရင်ဆိုင်ရနိုင်ပါသည်။ ခိုင်မာသော လူထုထောက်ခံမှုကို တည်ဆောက်ရန်နှင့် ထိခိုက်မှုရှိသော ကဏ္ဍများရှိ အလုပ်သမားများ၏ စိုးရိမ်ပူပန်မှုများ သက်သာစေရန်အတွက် အများပြည်သူ အဖွဲ့များနှင့် အစောပိုင်း ထိတွေ့ဆက်ဆံမှုမှာ အရေးကြီးသည်။ ထိုအပြင် ပုဂ္ဂလိကကဏ္ဍ၏ အကျိုးစီးပွားနှင့် စိုးရိမ်မှုများကို စောစီးစွာနားလည်ရန်နှင့် အစီအစဉ်တစ်ခုခုတွင် ပါဝင်မည့် အရင်းအမြစ်များအကြောင်းနှင့် ဖြစ်နိုင်ခြေရှိသော စာချုပ်ပါအပိုဒ်များအကြောင်း ရင်းနှီးမြှုပ်နှံသူများ အကြိုကြည့်ရှုနိုင်စေရန်အတွက် ပုဂ္ဂလိကကဏ္ဍနှင့် စောစီးစွာ ထိတွေ့ဆက်ဆံမှုသည် အရေးကြီးပါသည်။

အလားအလာရှိသော စိန်ခေါ်မှုများ

• နှစ်ရှည်စာချုပ်များ ရေးဆွဲခြင်းနှင့် စီမံခန့်ခွဲခြင်းတို့တွင်အစိုးရ၌ အတွေ့အကြုံမရှိခြင်း ပုဂ္ဂလိကကဏ္ဍနှင့် ပိုမိုပူးပေါင်းဆောင်ရွက်ရန် (ဥပမာ ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်းအတွက် လုပ်ပိုင်ခွင့်ပေးခြင်း သို့မဟုတ် ငှားရမ်းခြင်း သက်တမ်း) လိုအပ်သော စီမံကိန်းများအတွက် ပုဂ္ဂလိကကဏ္ဍနှင့် လက်တွဲလုပ်ကိုင်ရာတွင် အတွေ့အကြုံမရှိသော အစိုးရသည် အစီရင်ခံခြင်းဆိုင်ရာ လိုအပ်ချက်များ၊ စွမ်းဆောင်ရည် စောင့်ကြည့်ရေး လုပ်ငန်းစဉ်များနှင့် စီမံကိန်း၏ ရေရှည်တည်တံ့ခိုင်မြဲရေးနှင့် အများပြည်သူ အကျိုးစီးပွားကို သေချာစေမည့် နည်းလမ်းဖြင့် ပြန်လည်အပ်နှံမှု လုပ်ထုံးလုပ်နည်းများကို သတ်မှတ်ပေးသော စာချုပ်များအား ရေးဆွဲရာတွင် စိန်ခေါ်မှုများနှင့် ရင်ဆိုင်ရနိုင်သည်။ ထို့အပြင် အစိုးရသည် စီမံကိန်းလုပ်ငန်းစဉ်များအတွင်း ထိရောက်သော စာချုပ်စီမံခန့်ခွဲမှုနှင့် စွမ်းဆောင်ရည် စောင့်ကြည့်ခြင်းတို့ကို သေချာစေရန်အတွက် အတွေ့အကြုံမရှိခြင်းများ ဖြစ်နိုင်ပါသည်။
• ပြန်လည်အသုံးပြုရန်အတွက် သင့်လျော်သော ပိုင်ဆိုင်မှုများကိုဖော်ထုတ်ရာတွင် ခက်ခဲခြင်း။ ပုဂ္ဂလိကကဏ္ဍမှ မိတ်ဖက်များအတွက် ဆွဲဆောင်မှုရှိစေရန် ပိုင်ဆိုင်ပစ္စည်းများကို အပြုသဘောဆောင်သော ငွေသားစီးဆင်းမှု မှတ်တမ်းဖြင့် ပံ့ပိုးပေးရန် လိုအပ်ပြီး ပုဂ္ဂလိကကဏ္ဍမှ မိတ်ဖက်အတွက် ရှေ့ဆက်ဆောင်ရွက်ရာတွင် အပြုသဘောဆောင်သော ငွေသားစီးဆင်းမှုကို ရရှိနိုင်မည့် အလားအလာရှိရန် လိုအပ်သည်။ လုပ်ငန်းဆောင်ရွက်နေသော အစိုးရအာဏာပိုင်များထံ တန်ဖိုးတစ်ခုဆောင်ကြဉ်းပေးရန် လုပ်ငန်းမှရရှိသောဝင်ငွေသည် ကြွေးဆပ်နိုင်စေရန် နှင့်/သို့မဟုတ် ကြိုတင်ပေးဆောင်ရသည့် အခကြေးငွေသည် (စမတ်စီးတီး ဘဏ္ဍာငွေရှာဖွေရေး လိုအပ်ချက်များ အပါအဝင်) အစိုးရအသုံးစရိတ် လိုအပ်ချက်များကို ပံ့ပိုးရန်အတွက် လုံလောက်သော ရန်ပုံငွေ ဖြစ်ရန် လိုအပ်မည်။

အလားအလာရှိသော အကျိုးအမြတ်များ

• အစိုးရကြွေးမြီကို မတိုးစေဘဲအခြေခံအဆောက်အအုံ အသစ်များကို ရန်ပုံငွေထောက်ပံ့ပေးနိုင်သည့် ရွေးချယ်ခွင့်တစ်ခု ရစေသည်. ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်းသည် အစိုးရကို အကြွေးသစ်မတင်စေဘဲ လက်ရှိ အခြေခံအဆောက်အအုံကို အသုံးပြု၍ ဘဏ္ဍာငွေရှာဖွေရေး နည်းလမ်းအသစ်များကို ဖွင့်ပေးနိုင်သည် ရွေးချယ်ခွင့်တစ်ခု ပေးသည်။ ဤအရာက ၎င်း၏ ပိုင်ဆိုင်မှုအစုစု၏ တန်ဖိုးကို အကောင်းဆုံးဖြစ်အောင် မြှင့်တင်ပေးနိုင်ပြီး ရရှိလာသော ရန်ပုံငွေများသည် စမတ်စီးတီး စီမံကိန်းများကို ပိုမိုကျယ်ပြန့်စွာ ပံ့ပိုးပေးနိုင်ခြေရှိသည်။
• ပုဂ္ဂလိကကဏ္ဍနှင့် ပူးပေါင်းဆောင်ရွက်ခြင်းသည်အခြေခံအဆောက်အအုံ ဝန်ဆောင်မှုပေးခြင်းကို တိုးတက်ကောင်းမွန်စေနိုင်သည့် အလားအလာရှိနိုင်သည် ပုဂ္ဂလိကကဏ္ဍသည် လက်ရှိ အခြေခံအဆောက်အအုံများအတွက် နည်းပညာပိုင်းဆိုင်ရာ သို့မဟုတ် ကဏ္ဍအလိုက် ကျွမ်းကျင်သူအသစ်များကို ဆောင်ကြဉ်းပေးနိုင်ပြီး ထိရောက်မှု သို့မဟုတ် အခြေခံအဆောက်အအုံ ဝန်ဆောင်မှုကို တိုးမြှင့်ပေးနိုင်စွမ်းရှိသည်။ ပုဂ္ဂလိကကဏ္ဍမှမိတ်ဖက်အတွက် နှစ်ရှည် ငှားရမ်းမှု သို့မဟုတ် လုပ်ပိုင်ခွင့်ပေးမှု ပုံစံအောက်မှ အခြေခံအဆောက်အအုံတစ်ခုကို တိုးချဲ့ကာလတစ်ခုဖြင့် ဆက်လက်လုပ်ကိုင်ခွင့်ပေးခြင်းသည် ၎င်းကို အဆင့်မြှင့်တင်မှုများ ပြုလုပ်နိုင်ရေး ငွေကြေးထောက်ပံ့ရန်အတွက် မက်လုံးဖြစ်နိုင်သည်။

ရင်းမြစ်များ/ထပ်ဆောင်း အချက်အလက်များ

• ကမ္ဘာ့ဘဏ် (2023)။ ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်းဆိုင်ရာ လုပ်ငန်းများကို အကောင်အထည်ဖော်ရန် လမ်းညွှန်ချက်များ။ ဤဝက်ဘ်ဆိုက်စာမျက်နှာတွင်ဖတ်ရှုနိုင်သည်- https://ppp.worldbank.org/public-private-partnership/library/guidelines-implementing-asset-recycling-transactions-download-pdf-version-now-available
• Oliver Wyman (2018)။ အခြေခံအဆောက်အအုံ ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်း- အစိုးရများနှင့် ရင်းနှီးမြှုပ်နှံသူများအတွက် အတွင်းကျကျသိကောင်းစရာများ။ ဤဝက်ဘ်ဆိုက်စာမျက်နှာတွင်ဖတ်ရှုနိုင်သည်- https://www.oliverwyman.com/content/dam/oliver-wyman/v2/publications/infrastructure-asset-recycling-grc.pdf
• ကမ္ဘာ့ဘဏ် (2023)။ နိုင်ငံများအနေဖြင့် ပိုင်ဆိုင်ပစ္စည်းများကို ပြန်လည်ဖန်တီးအသုံးပြုခြင်းကို အကောင်အထည်ဖော်သင့်သည့် အကြောင်းရင်းနှင့် လမ်းညွှန်ချက်ကောင်းများ ရယူရန် နေရာ။ ဤဝက်ဘ်ဆိုက်စာမျက်နှာတွင်ဖတ်ရှုနိုင်သည်- https://blogs.worldbank.org/en/ppps/why-countries-should-implement-asset-recycling-and-where-get-good-guidance