ກອງທຶນເພື່ອການພັດທະນາພາກພື້ນ

ຄຳອະທິບາຍ

ກອງທຶນເພື່ອການພັດທະນາໃນພາກພື້ນເປັນກົນໄກທາງການເງິນທີ່ສົ່ງເສີມຄຸນນະພາບຊີວິດທີ່ສູງ, ເສດຖະກິດທີ່ມີການແຂ່ງຂັນ ແລະ ສະພາບແວດລ້ອມທີ່ໝັ້ນຄົງຜ່ານການສະໜັບສະໜູນໂຄງການລິເລີ່ມເມືອງອັດສະລິຍະ. ກອງທຶນດັ່ງກ່າວມາຈາກລັດຖະບານ, ອົງການພັດທະນາສາກົນ ແລະ ນັກລົງທຶນເອກະຊົນ. ຕົວຢ່າງຈໍານວນໜຶ່ງໄດ້ແກ່ກອງທຶນຄວາມໄວ້ວາງໃຈຂອງ ອາຊ່ຽນ (ASEAN) ອົດສະຕາລີ (AASCTF), ກອງທືນວັດທະນະທໍາ-ທຸລະກິດເມືອງອັດສະລິຍະ ສະຫະລັດ-ອາຊ່ຽນ (US-ASEAN) ແລະ ກອງທຶນພັດທະນາໂຄງສ້າງພື້ນຖານຂອງທະນາຄານໂລກ. ໂດຍທົ່ວໄປແລ້ວ ກອງທຶນເຫຼົ່ານີ້ຈະສະໜັບສະໜູນລັດຖະບານ/ເມືອງຍ່ອຍ ໃນການກະກຽມ ແລະ ຈັດຕັ້ງປະຕິບັດໂຄງການການເງິນ ແລະ ການພັດທະນາຄວາມສາມາດທີ່ກ່ຽວຂ້ອງໂດຍເນັ້ນໃສ່ຜົນທີ່ໄດ້ ຮັບທີ່ສາມາດວັດແທກໄດ້ລວມເຖິງການພັດທະນາແບບຄວບຄຸມ ແລະ ຍືນຍົງ.

ເງື່ອນໄຂການເປີດໃຊ້ງານ ແລະ ການພິຈາລະນາທີ່ສຳຄັນ

• ສອດຄ່ອງກັບຈຸດປະສົງຂອງກອງທຶນ. ໂຄງການທີ່ກຳລັງຊອກຫາທຶນຕ້ອງສອດຄ່ອງຢ່າງໃກ້ສິດກັບຄວາມຕ້ອງການສະເພາະ, ຈຸດປະສົງ ແລະ ບູລິມະສິດຂອງແຕ່ລະກອງທຶນ. ເຊິ່ງກ່ຽວຂ້ອງກັບຄວາມເຂົ້າໃຈຢ່າງລະອຽດກ່ຽວກັບຂົງເຂດທີ່ກອງທຶນແນໃສ່, ພາກພື້ນເປົ້າໝາຍ ແລະ ຜົນໄດ້ຮັບທີ່ໄດ້ຕັ້ງໃຈໄວ້.
• ຜົນກະທົບທາງດ້ານເສດຖະກິດ-ສັງຄົມ ແລະ ສິ່ງແວດລ້ອມ. ໂຄງການຕ່າງໆຄວນສະແດງໃຫ້ເຫັນເຖິງຜົນປະໂຫຍດທາງດ້ານ ເສດຖະກິດ-ສັງຄົມ ແລະ ສິ່ງແວດລ້ອມຢ່າງຊັດເຈນເຊັ່ນ: ການສ້າງວຽກເຮັດງານທຳ, ການປັບປຸງການເຂົ້າເຖິງການບໍລິການທີ່ດີ, ການຫຼຸດຜ່ອນການປ່ອຍອາຍພິດກາກບອນ ແລະ ຄວາມສາມາດໃນການຟື້ນຕົວຕໍ່ການປ່ຽນແປງຂອງສະພາບອາກາດ. ກອບ ແລະ ຕົວຊີ້ວັດການປະເມີນຜົນກະທົບຄວນຖືກລວມເຂົ້າໃນການວາງແຜນ ແລະ ການດໍາເນີນໂຄງການ.
• ຄວາມເປັນໄປໄດ້ທາງດ້ານການເງິນ ແລະ ຄວາມຍືນຍົງ. ຂໍ້ສະເໜີຄວນຮ່າງແຜນການທາງການເງິນທີ່ຊັດເຈນ, ລວມທັງການ ປະເມີນຕົ້ນທຶນ, ແຫຼ່ງເງິນທຶນ, ກົນໄກການສ້າງລາຍຮັບ ແລະ ຍຸດທະສາດເພື່ອຄວາມຍືນຍົງໃນໄລຍະຍາວກວ່າໄລຍະເວລາ ຂອງການໃຫ້ທຶນ. ຄວາມເປັນໄປໄດ້ທາງດ້ານການເງິນເປັນສິ່ງທີ່ສໍາຄັນຕໍ່ກັບການດຶງດູດການລົງທຶນ ແລະ ຮັບປະກັນຄວາມ ຕໍ່ເນືອງຂອງໂຄງການ.

ສິ່ງທ້າທາຍທີ່ອາດຈະເກີດຂຶ້ນ

• ການເຂົ້າເຖິງເງິນທຶນມັກຈະມີການແຂ່ງຂັນ. ການ​ແຂ່ງ​ຂັນ​ທຶນ​ພັດ​ທະ​ນາ​ພາກ​ພື້ນ​ແມ່ນ​ມີ​ຄວາມ​ເຄັ່ງ​ຕຶງ, ໂດຍມີ​ຜູ້​ມີ​ສ່ວນ​ຮ່ວມ​ຫຼາຍ​ຄົນ​ແຂ່ງ​ຂັນ​ກັບ​ແຫຼ່ງ​ທຶນ​ທີ່​ຈຳ​ກັດ. ການໄດ້ຮັບເງິນທຶນຈໍາເປັນຕ້ອງສົ່ງຂໍ້ສະເໜີທີ່ມີຄຸນນະພາບສູງເຊິ່ງລະບຸຈຸດປະສົງຂອງໂຄງການ, ຜົນໄດ້ຮັບ ແລະ ຜົນກະທົບໄດ້ຢ່າງຊັດເຈນ, ມັນເປັນເລື່ອງທີ່ທ້າທາຍຕໍ່ກັບຜູ້ສະໝັກບາງຄົນທີ່ມີຄວາມໂດດເດັ່ນໃນລະຫວ່າງ ຜູ້ສະໝັກອື່ນໆ.
• ຂະບວນການສະໝັກ ແລະ ການອະນຸມັດອາດໃຊ້ເວລາດົນນານ. ຂະບວນການສະໝັກອາດມີຄວາມຍາວ, ເປັນລະບົບທາງລັດຖະການ ແລະ ສະຫຼັບຊັບຊ້ອນ. ການດຳເນີນຜ່ານຂັ້ນຕອນຂອງການອະນຸມັດ, ຂໍ້ກໍານົດການປະຕິບັດຕາມ ແລະ ເອກະສານປະຫຼາຍ ຂັ້ນຕອນສາມາດສ້າງສິ່ງທ້າທາຍທີ່ສໍາຄັນສໍາລັບຜູ້ສະໝັກທີ່ມີທ່າແຮງ, ໂດຍສະເພາະສໍາລັບອົງການ ຂະຫນາດນ້ອຍກວ່າ ຫຼື ລັດຖະບານທ້ອງຖິ່ນທີ່ມີຊັບພະຍາກອນ ແລະ ຄວາມຊໍານານຈໍາກັດ.
• ຜູ້ຮັບອາດຈະປະເຊີນກັບສິ່ງທ້າທາຍໃນການປະຕິບັດຕາມມາດຕະຖານການຕິດຕາມ ແລະ ການປະເມີນຜົນ. ຜູ້ຮັບທີ່ໄດ້ຮັບ ເງິນທຶນອາດຈະຕ້ອງປະຕິບັດຕາມຂໍ້ກໍານົດການລາຍງານ ແລະ ຄວາມຮັບຜິດຊອບທີ່ເຂັ້ມງວດ. ການຕິດຕາມ ແລະ ປະເມີນຄວາມ ຄືບໜ້າ, ຜົນໄດ້ຮັບ ແລະ ຜົນກະທົບຂອງໂຄງການທີ່ໄດ້ຮັບທຶນສະໜັບສະໜູນຈໍາເປັນຕ້ອງມີຊັບພະຍາກອນ, ຄວາມຊ່ຽວຊານ ແລະ ກົນໄກການເກັບກຳຂໍ້ມູນທີ່ພຽງພໍ. ຄວາມສາມາດໃນການຕິດຕາມທີ່ຈໍາກັດ, ຄວາມພ້ອມໃຊ້ງານຂອງຂໍ້ມູນ ແລະ ກອບການປະ ເມີນຜົນອາດຈະສົ່ງຜົນຕໍ່ຄວາມສາມາດໃນການປະເມີນປະສິດທິຜົນຂອງໂຄງການ ແລະ ການຕັດສິນໃຈຢ່າງມີຂໍ້ມູນເພື່ອການຈັດ ສັນທຶນໃນອະນາຄົດ.
• ອຸປະສັກທາງດ້ານນະໂຍບາຍ ແລະ ລະບຽບການ. ອຸປະສັກທາງດ້ານນະໂຍບາຍ ແລະ ລະບຽບການລວມທັງກອບກົດໝາຍ, ຂະບວນການຈັດຊື້ ແລະ ອຸປະສັກທາງລະບົບລັດຖະການສາມາດກີດຂວາງການເບີກຈ່າຍ ແລະ ການດໍາເນີນໂຄງການທີ່ໄດ້ຮັບ ທຶນໃຫ້ທັນເວລາ. ກົດລະບຽບການທີ່ບໍ່ສອດຄ່ອງກັນໃນທົ່ວເຂດອຳນາດການປົກຄອງ ຫຼື ບູລິມະສິດທີ່ຂັດແຍ້ງກັນລະຫວ່າງ ບັນດາປະເທດທີ່ເຂົ້າຮ່ວມອາດຈະເຮັດໃຫ້ສິ່ງທ້າທາຍເຫຼົ່ານີ້ຮ້າຍແຮງຂຶ້ນຕື່ມ.

ຜົນປະໂຫຍດທີ່ອາດຈະເກີດຂຶ້ນ

• ການສະໜັບສະໜູນຢ່າງກວ້າງຂວາງສໍາລັບໂຄງສ້າງພື້ນຖານທີ່ສໍາຄັນ. ກອງທຶນເຫຼົ່ານີ້ສະໜອງແຫຼ່ງການເງິນທີ່ຈຳເປັນຫຼາຍເພື່ອສະໜັບສະໜູນການພັດທະນາຕົວເມືອງອັດສະລິຍະ ແລະ ໂຄງການໂຄງສ້າງ ພື້ນຖານໂຄງລ່າງທີ່ສຳຄັນໃນກຸ່ມປະເທດສະມາຊິກອາຊ່ຽນ (ASEAN). ເງິນທຶນເຫຼົ່ານີ້ສາມາດນຳໃຊ້ໄດ້ຫຼາຍຈຸດປະສົງ, ລວມທັງການພັດທະນາໂຄງສ້າງພື້ນຖານໂຄງລ່າງ, ການນຳເອົາເຕັກໂນໂລຊີມາໃຊ້, ການສ້າງຂີດຄວາມອາດສາມາດ ແລະ ການປະຕິຮູບນະໂຍບາຍ.
• ອຳນວຍຄວາມສະດວກໃຫ້ແກ່ການຖ່າຍທອດເຕັກໂນໂລຊີ ແລະ ນະວັດຕະກໍາ. ກອງທຶນເພື່ອພັດທະນາພາກພື້ນອໍານວຍຄວາມ ສະດວກໃນການຖ່າຍໂອນເຕັກໂນໂລຊີທີ່ກ້າວໜ້າ ແລະ ການແກ້ໄຂທີ່ເປັນນະວັດຕະກໍາໃຫ້ກັບສະມາຊິກອາຊຽນ (ASEAN). ໂດຍການສະໜັບສະໜູນໂຄງການທີ່ນໍາໃຊ້ປະໂຫຍດຈາກເຕັກໂນໂລຢີທີ່ກ້າວໜ້າເຊັ່ນ: IoT, AI ແລະ ພະລັງງານໝູນວຽນ, ກອງທຶນເຫຼົ່ານີ້ຊ່ວຍເລັ່ງນະວັດຕະກຳທາງເຕັກໂນໂລຢີ ແລະ ການຫັນເປັນດິຈິຕອນໃນຂົງເຂດຕົວເມືອງ.
• ສົ່ງເສີມການພັດທະນາແບບຍືນຍົງ. ໂຄງການທີ່ໄດ້ຮັບທຶນສະໜັບສະໜູນຈາກກອງທຶນເພື່ອການພັດທະນາພາກພື້ນສາມາດສົ່ງເສີມວິທີການປະຕິບັດດ້ານການພັດທະນາແບບຍືນຍົງໃນລັດສະມາ ຊິກອາຊຽນ (ASEAN Member state). ນີ້ລວມເຖິງການລົງທຶນໃນໂຄງສ້າງພື້ນຖານໂຄງລ່າງສີຂຽວ, ອາຄານທີ່ມີປະສິດທິພາບດ້ານພະລັງງານ, ລະບົບການຂົນສົ່ງແບບຍືນຍົງ ແລະ ການວາງແຜນຕົວເມືອງທີ່ທົນທານຕໍ່ສະພາບອາກາດ ເຊິ່ງປະກອບສ່ວນເຂົ້າໃນການປົກປ້ອງສິ່ງແວດລ້ອມ ແລະ ການແກ້ໄຂການປ່ຽນແປງຂອງສະພາບອາກາດ.

ແຫຼ່ງຂໍ້ມູນ/ຂໍ້ມູນຂ່າວສານເພີ່ມເຕີມ

1. ທະນາຄານໂລກ (2020). ໂຄງການສຳປະທານກໍ່ສ້າງ-ດຳເນີນງານ-ໂອນ (BOT) ແລະ ໂຄງການອອກແບບ-ກໍ່ສ້າງ-ດຳເນີນງານ (DBO). ສາມາດເຂົ້າເບິ່ງຂໍ້ມູນໄດ້ທີ່: https://ppp.worldbank.org/public-private-partnership/agreements/concessions-bots-dbos
2. ທ່ານ ທອມຊັນ ຣູເທີ (Thomson Reuters) (2024). ການສຳປະທານ. ສາມາດເຂົ້າເບິ່ງຂໍ້ມູນໄດ້ທີ່: https://content.next.westlaw.com/Glossary/PracticalLaw/I1c635e3fef2811e28578f7ccc38dcbee?transitionType=Default&contextData=(sc.Default)
3. ທະນາຄານ ພັດທະນາອາຊີ (ADB) (n.d.). ປື້ມຄູ່ມືການຮ່ວມງານທາງພາກລັດ ແລະ ພາກເອກະຊົນ. ສາມາດເຂົ້າເບິ່ງຂໍ້ມູນໄດ້ທີ່: https://www.adb.org/sites/default/files/institutional-document/31484/public-private-partnership.pdf
4. PPIAF (2008). ການສໍາປະທານພາກສະໜາມສີນໍ້າຕານກຽມພ້ອມສໍາລັບການກັບຄືນມາ ຫຼື ບໍ່? ສາມາດເຂົ້າເບິ່ງຂໍ້ມູນໄດ້ທີ່:  https://www.ppiaf.org/sites/default/files/documents/2008-01/Gridlines-32-Brownfield_20Concessions_20-_20JLeigland.pdf
5. ທະນາຄານພັດທະນາອາຊີ (2020). ກອງທຶນ Trust ຕົວເມືອງອັດສະລິຍະ ASEAN ອົດສະຕາລີ (AASCTF) ສາມາດເຂົ້າເບິ່ງຂໍ້ມູນໄດ້ທີ່: https://www.adb.org/sites/default/files/institutional-document/729721/aasctf-annual-progress-report-2020.pdf
6.  ຄວາມເປັນຄູ່ຮ່ວມມືຕົວເມືອງອັດສະລິຍະ ສະຫະລັດ-ອາຊ່ຽນ (US-ASEAN) (n.d.). ກອງທຶນປະດິດສ້າງທຸລະກິດເມືອງອັດສະລິຍະ. ສາມາດເຂົ້າເບິ່ງຂໍ້ມູນໄດ້ທີ່: https://www.usascp.org/programs/climate-finance/
7. ທະນາຄານໂລກ (n.d.). ກອງທຶນພັດທະນາໂຄງສ້າງພື້ນຖານໂຄງລ່າງໃນພາກພື້ນ. ສາມາດເຂົ້າເບິ່ງຂໍ້ມູນໄດ້ທີ່: https://projects.worldbank.org/en/projects-operations/project-detail/P154947