ເຄື່ອງມືທາງດ້ານການສະໜອງເງິນທຶນ ແລະ ຈຳນວນເງິນ
ລັດຖະບານບຣູໄນໄດ້ຈັດສັນເງິນເປັນຈຳນວນ 18 ລ້ານໂດລາບຼູໄນ (13,4 ລ້ານໂດລາສະຫະລັດ)* ໃຫ້ແກ່ການພັດທະນາ ແອັບ BruHealth ໄລຍະທີ II ແລະ III ໃນງົບປະມານຂອງຕົນໃນປີງົບປະມານ FY23/24.
ຄວາມເປັນມາ
ແອັບພຼີເຄຊັນ ສຸຂະພາບເຄື່ອນທີ່ແຫ່ງຊາດໃຫ້ໂອກາດໃນການຕິດຕາມທາງໄກ, ການປຶກສາຫາລືທາງໄກ, ການດູແລຄືຕົວຈິງ, ການແລກປ່ຽນຂໍ້ມູນ ແລະ ການລວບລວມຂໍ້ມູນຈາກໄລຍະໄກເພື່ອປັບປຸງຄຸນນະພາບຂອງການບໍລິການດ້ານການດູແລສຸຂະພາບ. ໂດຍສະເພາະຢ່າງຍິ່ງ, ພວກເຂົາຊ່ວຍເຮັດໃຫ້ສາມາດລວມຂໍ້ມູນສຸຂະພາບສ່ວນບຸກຄົນເຊິ່ງສາມາດສະໜັບສະໜູນການໃຫ້ບໍລິການ ດ້ານການດູແລສຸຂະພາບ ລວມທັງການສ້າງນະໂຍບາຍທີ່ກ່ຽວຂ້ອງກັບການດູແລສຸຂະພາບ.
ໃນປະເທດບຣູໄນ, ແອັບ BruHealth – ເຊິ່ງເລີ່ມນໍາມາໃຊ້ເປັນເຄື່ອງມືທຳອິດໃນການຕິດຕາມການສຳຜັດສໍາລັບການຕອບສະໜອງ ກັບພະຍາດ COVID-19 ແຫ່ງຊາດ – ໄດ້ຖືກຂະຫຍາຍອອກເພື່ອບູລະນະຟັງຊັນການດູແລສຸຂະພາບຕ່າງໆ ລວມທັງຄຸນລັກສະນະການຄຸ້ມຄອງສຸຂະພາບທາງດ້ານຄລີນິກ ແລະ ສຸຂະພາບປະຊາກອນເຂົ້າໄປໃນ ແພຼັດຟອມດຽວ ໂດຍໄດ້ຮັບທຶນສະໜັບສະໜູນຈາກງົບປະມານການເງິນຂອງລັດຖະບານແຫ່ງຊາດ.
ວິທີການ
ແອັບ BruHealth ໄດ້ຖືກເປີດຕົວໃນເດືອນ ພຶດສະພາ 2020 ເປັນແພຼັດຟອມຄືຕົວຈິງເພື່ອຄວບຄຸມການແຜ່ລະບາດຂອງພະຍາດ COVID-19 ໃນປະເທດບຣູໄນ ໂດຍເນັ້ນໃສ່ການຕິດຕາມການສຳຜັດ ແລະ ຕໍ່ມາໄດ້ຂະຫຍາຍຂອບເຂດອອກໄປ ເພື່ອສະທ້ອນເຖິງສະຖານະການຕິດເຊື້ອ COVID-19 ແລະ ການສັກຢາປ້ອງກັນ, ການອອກຄຳສັ່ງກັກກັນທາງດິຈິຕອລ ແລະ ເຮັດໃຫ້ການຄັດແຍກຄົນເຈັບພະຍາດ COVID-19 ທີ່ຮັກສາຕົວຢູ່ເຮືອນເປັນລະບົບອັດຕະໂນມັດ. ຕໍ່ມາ ຟັງຊັນຂອງແອັບ BruHealth ໄດ້ຖືກຂະຫຍາຍອອກໄປໃຊ້ໃນເລື່ອງທີ່ບໍ່ກ່ຽວຂ້ອງກັບ ພະຍາດ COVID-19 ເຊັ່ນ: ການຈອງການນັດພົບການດູແລສຸຂະພາບທາງອອນລາຍ, ການກວດສອບບັນທຶກໃບສັ່ງຢາ ລວມທັງການເບິ່ງຜົນການທົດສອບທາງການແພດ.
ຜ່ານການນຳໃຊ້ທີ່ປະສົບຜົນສຳເລັດ ແລະ ແພ່ຢ່າງກວ້າງຂວາງ, ກະຊວງສາທາລະນະສຸກ ບຣູໄນ ໄດ້ສືບຕໍ່ຂະຫຍາຍ ແລະ ປັບປຸງຄຸນສົມບັດຕ່າງໆຂອງລະບົບ ແອັບ BruHealth ຢ່າງຕໍ່ເນື່ອງ ແລະ ໄດ້ຈັດສັນງົບປະມານ 18 ລ້ານໂດລາບລູໄນ (13.4 ລ້ານໂດລາສະຫະລັດ)* ເພື່ອການພັດທະນາ ແອັບ BruHealth ໄລຍະ II ແລະ III ໃນງົບປະມານການເງີນຂອງ ບຣູໄນ ສໍາລັບງົບປະມານປີ 23/24. ຄຸນສົມບັດເພີ່ມເຕີມທີ່ໄດ້ເປີດຕົວ ລວມມີລະບົບການຈັດການຄິວສຳລັບການນັດພົບຢູ່ຄລີນິກຂອງລັດຖະບານ, ຟັງຊັນການໃຫ້ຄຳປຶກສາທາງວິດີໂອ, ຟັງຊັນການເຊັກອິນດ້ວຍຕົນເອງ ແລະ ຄຸນສົມບັດ ບັນທຶກສຸຂະພາບຂອງຄົນເຈັບ ທີ່ຊ່ວຍໃຫ້ຜູ້ໃຊ້ສາມາດກວດເບິ່ງບັນທຶກປະຫວັດສຸຂະພາບຂອງເຂົາເຈົ້າໄດ້ ເຊັ່ນ: ຜົນກວດຈາກຫ້ອງທົດລອງ, ບັນທຶກການໄປພົບແພດ, ບັນທຶກການໃຊ້ຢາ ແລະ ບັນທຶກການສັກຢາປ້ອງກັນ. ໃນປີ 2023, ແອັບດັ່ງກ່າວຍັງໄດ້ເປີດເຜີຍຄຸນສົມບັດໃໝ່ທີ່ເອີ້ນວ່າ “BN on the Move 2023” ເຊິ່ງມີເປົ້າໝາຍເພື່ອສົ່ງເສີມກິດຈະກຳການອອກກຳລັງກາຍຂອງບັນດາປະຊາກອນ.
ຜົນໄດ້ຮັບ
ແອັບ BruHealth ຖືກນໍາໃຊ້ຢ່າງກວ້າງຂວາງໂດຍປະຊາກອນທີ່ຢູ່ອາໄສໃນ ປະເທດບຣູໄນ, ມາຮອດເດືອນ ພຶດສະພາ 2022, 63% ຂອງປະຊາກອນທີ່ຢູ່ອາໄສຢູ່ໃນ ປະເທດບຣູໄນ ໄດ້ເຂົ້າສູ່ລະບົບ ແພຼັດຟອມ ແອັບ BruHealth ຂອງພວກເຂົາທຸກໆອາທິດ, ໂດຍສ່ວນໃຫຍ່ແມ່ນເຂົ້າສູ່ລະບົບເພື່ອເຂົ້າເຖິງຜົນການກວດຈາກຫ້ອງທົດລອງ.
ເປັນແພຼັດຟອມ ແບບປະສົມປະສານສໍາລັບການເຂົ້າເຖິງຂໍ້ມູນທີ່ກ່ຽວຂ້ອງກັບສຸຂະພາບສໍາລັບຜູ້ໃຊ້ລາຍບຸກຄົນ ແລະ ຫຼີກເວັ້ນການກະແຈກກະຈາຍຂອງໂຄງສ້າງພື້ນຖານທາງດ້ານສຸຂະພາບດິຈິຕອນໃນປະເທດບຣູໄນ. ແອັບ BruHealth ຖືກລວມເຂົ້າກັບລະບົບບັນທຶກສຸຂະພາບທາງອີເລັກໂທຣນິກແຫ່ງຊາດ ແບບລວມສູນທີ່ມີຢູ່ແລ້ວ ເຊິ່ງເປັນຖານຂໍ້ມູນລະບົບການຄຸ້ມຄອງຂໍ້ມູນສຸຂະພາບຂອງບຣູໄນ (BruHIMS) ທີ່ກວມເອົາປະຊາກອນທີ່ອາໄສຢູ່ ປະເທດ ບຣູໄນຫຼາຍກວ່າ 95%. ລາຍລະອຽດຂອງຜູ້ໃຊ້ງານຍັງມາຈາກຖານຂໍ້ມູນແຫ່ງຊາດອື່ນໆລວມທັງຂໍ້ມູນຄົນເຂົ້າເມືອງທີ່ໃຫ້ລາຍລະອຽດຂອງຂໍ້ມູນຕິດຕໍ່ ແລະ ທີ່ຢູ່ຂອງຜູ້ໃຊ້ປັດຈຸບັນ, ຂໍ້ມູນຈາກພະແນກແຮງງານທີ່ ເຊື່ອມຕໍ່ຂໍ້ມູນໃນບ່ອນເຮັດວຽກ ແລະ ຂໍ້ມູນຈາກພະແນກໂຮງຮຽນທີ່ ເຊື່ອມຕໍ່ຂໍ້ມູນຈາກຜູ້ທີ່ໄດ້ລົງທະບຽນຢູ່ໃນສະຖາບັນການສຶກສາ.
ການຮຽນຮູ້
ການສົ່ງເສີມການສື່ສານສາທາລະນະທີ່ເຂັ້ມແຂງທີ່ມີການສະໜັບສະໜູນຂອງລັດຖະບານແຫ່ງຊາດ
ແອັບ BruHealth ໄດ້ຮັບການສະໜັບສະໜູນຈາກການສົ່ງເສີມການສື່ສານສາທາລະນະທີ່ເຂັ້ມແຂງທີ່ນໍາພາໂດຍລັດຖະບານກາງທີ່ມີການສື່ສານຢ່າງຫ້າວຫັນ ແລະ ເລື້ອຍໆໂດຍຜ່ານການເຜີຍແຜ່ຂ່າວ ແລະ ການຖະແຫຼງຂ່າວໂດຍລັດຖະມົນຕີວ່າການກະຊວງສາທາລະນະສຸກ ແລະ ສໍານັກງານນາຍົກລັດຖະມົນຕີ. ກະຊວງສາທາລະນະສຸກມີຄວາມໂປ່ງໃສກ່ຽວກັບຂໍ້ບົກຜ່ອງ ຫຼື ບັນຫາຂອງແອັບ ແລະ ໄດ້ຈັດໃຫ້ມີຊ່ອງທາງໃຫ້ປະຊາຊົນສາມາດສອບຖາມ ຫຼື ຮ້ອງທຸກກ່ຽວກັບບັນຫາທີ່ກ່ຽວຂ້ອງກັບ ແອັບ BruHealth ຜ່ານສາຍດ່ວນໂທລະສັບແຫ່ງຊາດທີ່ເປີດໃຫ້ບໍລການຕະຫຼອດ 24 ຊົ່ວໂມງ.
ການພັດທະນາຂອງສະພາບແວດລ້ອມທີ່ເອື້ອອຳນວຍ.
ຄວາມຈໍາເປັນທີ່ຮີບດ່ວນທີ່ຈະສ້າງລະບົບການເຝົ້າລະວັງດ້ານສຸຂະພາບຂອງປະຊາຊົນທີ່ເຂັ້ມແຂງກວ່າເກົ່າເພື່ອຮັບມືກັບໄພຂົ່ມຂູ່ຂອງພະຍາດ COVID-19 ໄດ້ຊ່ວຍຊຸກຍູ້ໃຫ້ມີການພັດທະນາຂອງ ແອັບ BruHealth ແລະ ການນໍາໃຊ້ ແອັບ BruHealth ໄດ້ຮັບການສະໜັສະໜູນຈາກກົດໝາຍທີ່ກໍານົດໃຫ້ຕ້ອງມີຫຼັກຖານສະຖານະການສັກຢາວັກຊີນເພື່ອເຂົ້າສູ່ສະຖານທີ່ສາທາລະນະບາງແຫ່ງເຊິ່ງສົ່ງເສີມການເພິ່ງພາແອັບ. ໃນສ່ວນໜຶ່ງເປັນການຕອບສະໜອງຕໍ່ ແອັບ BruHealth ແລະ ຂໍ້ມູນສ່ວນບຸກຄົນຈໍານວນມະຫາສານທີ່ລວມໄວ້ຢູ່ໃນແອັບ, ຂະນະນີ້ ໜ່ວຍງານດ້ານອຸດສາຫະກໍາເຕັກໂນໂລຊີຂໍ້ມູນຂ່າວສານ ແລະ ການສື່ສານ ຂອງ Brunei Darussalam (AITI) ກໍາລັງພັດທະນາກົດໝາຍວ່າດ້ວຍການຄຸ້ມຄອງຂໍ້ມູນສ່ວນບຸກຄົນສະບັບໃໝ່ເພື່ອຄວບຄຸມການເກັບກໍາ, ການນໍາໃຊ້ ແລະ ການເປີດເຜີຍຂອງຂໍ້ມູນສ່ວນບຸກຄົນໂດຍອົງການຈັດຕັ້ງເອກະຊົນ.
ວິທີການແບບເປັນຂັ້ນຕອນໄປສູ່ການນໍາສະເໜີຄຸນສົມບັດໃໝ່
ແອັບ BruHealth ໄດ້ຖືກເປີດຕົວໃນເບື້ອງຕົ້ນເປັນແພຼັດຟອມຄືຕົວຈິງ ເພື່ອຄວບຄຸມການແຜ່ລະບາດຂອງພະຍາດ COVID-19 ໃນປະເທດບຣູໄນ ໂດຍເນັ້ນໃສ່ການຕິດຕາມຜູ້ສຳຜັດເຊື້ອ. ຄຸນສົມບັດເພີ່ມເຕີມ ເຊັ່ນ: ການຕິດຕາມຜູ້ສຳຜັດເຊື້ອດ້ວຍ ບຣູທູດ (Bluetooth), ການອອກຄໍາສັ່ງກັກກັນທາງດິຈິຕອລ ແລະ ການກວດຄັດແຍກແບບອັດຕະໂນມັດສໍາລັບຄົນເຈັບ COVID-19 ໃນການຟື້ນຟູຢູ່ເຮືອນໄດ້ຮັບການແນະນໍາເມື່ອມີຄວາມຕ້ອງການໃໝ່ເກີດຂື້ນ ແລະ ແອັບໄດ້ຖືກຄ່ອຍໆປ່ຽນໄປໃຊ້ ແລະ ຂະຫຍາຍເພື່ອຮອງຮັບຄຸນສົມບັດທີ່ບໍ່ກ່ຽວຂ້ອງ COVID-19, ເຊິ່ງຊ່ວຍໃຫ້ຜູ້ໃຊ້ມີເວລາໃນການສ້າງຄວາມຄຸ້ນເຄີຍກັບການນໍາໃຊ້ແອັບ ແລະ ຊ່ວຍໃຫ້ສາມາດແກ້ໄຂຂໍ້ບົກຜ່ອງໄດ້ເປັນໄລຍະ.
ແຫຼ່ງຂໍ້ມູນ/ຂໍ້ມູນຂ່າວສານເພີ່ມເຕີມ
- AITI. ການປົກປ້ອງຂໍ້ມູນສ່ວນບຸກຄົນ. ສາມາດເຂົ້າເບິ່ງຂໍ້ມູນໄດ້ທີ່: https://www.aiti.gov.bn/regulatory/pdp/
- ວາລະສານສຸຂະພາບໂລກ (2022). ການພັດທະນາ ແລະ ການໃຊ້ງານແອັບພຼີເຄຊັນສຸຂະພາບເຄື່ອນທີ່ແຫ່ງຊາດ: ກໍລະນີສຶກສາຈາກບຣູໄນ. ສາມາດເຂົ້າເບິ່ງຂໍ້ມູນໄດ້ທີ່: https://jogh.org/2022/jogh-12-03083
- HealthcareAsia. (2024). ບຣູໄນເປີດຕົວແອັບ BruHealth ເວີຊັນປັບປຸງໃໝ່. ສາມາດເຂົ້າເບິ່ງຂໍ້ມູນໄດ້ທີ່: https://healthcareasiamagazine.com/healthcare/news/brunei-unveils-enhanced-bruhealth-app
- ຂ່າວເດັ່ນ (2023). ລັດຖະບານວາງແຜນງົບປະມານ 5,96 ຕື້ໂດລາສະຫະລັດຍັງມີຄວາມລະມັດລະວັງຕໍ່ການຄາດຄະເນເສດຖະກິດ. ສາມາດເຂົ້າເບິ່ງຂໍ້ມູນໄດ້ທີ່: https://thescoop.co/2023/03/07/govt-tables-5-96-billion-budget-remains-cautious-on-economic-outlook/
- *ໝາຍເຫດ: ມູນຄ່າຂອງສະກຸນເງິນໂດລາສະຫະລັດ ແມ່ນຄິດໄລ່ໂດຍອິງຕາມອັດຕາແລກປ່ຽນສະເລ່ຍ 12 ເດືອນໃນປີ 2023. ດຶງຂໍ້ມູນຈາກ ເວັບໄຊ້: https://www.exchangerates.org.uk/BND-USD-spot-exchange-rates-history-2023.html
