ກອງທຶນຊ່ວຍເຫຼືອທາງດ້ານເຕັກນິກວິຊາການ

ຄຳອະທິບາຍ

ກອງທຶນການຊ່ວຍເຫຼືອທາງດ້ານເຕັກນິກວິຊາການເປັນການລະດົມ ທຶນທີ່ ຊ່ວຍເຫຼືອຜູ້ຮັບ ໄດ້ຮັບບໍລິການ ຫຼື ທັກສະ ພິເສດ ທີ່ຈໍາເປັນຕໍ່ການດໍາເນີນການຂອງພວກເຂົາ​ຢ່າງ​ມີ​ປະ​ສິດ​ທິ​ພາບຫຼາຍຂຶ້ນ​ໃນ​ໂຄງ​ການ ເມືອງອັດສະລິຍະ. ສິ່ງເຫຼົ່ານີ້ເປັນກະແຈສໍາຄັນໃນການ ປັບປຸງນະໂຍບາຍ ແລະ ການອອກແບບໂຄງການ, ການເສີມສ້າງທັກສະ ແລະ ເສີມສ້າງຄວາມສາມາດໃນການດໍາເນີນການ ແລະ ສໍາລັບການພັດທະນາສະຖາບັນໂດຍທົ່ວໄປ. ຕົວຢ່າງຂອງທຶນສະໜັບສະໜູນດັ່ງກ່າວໄດ້ແກ່ກອງທຶນຊ່ວຍເຫຼືອພິເສດດ້ານເຕັກນິກ ວິຊາການໂດຍ ທະນາຄານ ພັດທະນາ ອາຊີ (ADB), ກອງທຶນເຕັກໂນໂລຢີສະອາດ (CTF) ໂດຍ ກອງທຶນເພື່ອການລົງທຶນດ້ານສະພາບອາກາດ (CIF), ແລະ ທະນາຄານເພື່ອການລົງທຶນເອີຣົບ (EIB) ສິ່ງອໍານວຍຄວາມສະດວກດ້ານການດໍາເນີນການດ້ານສະພາບອາກາດ ແລະ ສິ່ງແວດລ້ອມ. ເງິນທຶນເຫຼົ່ານີ້ໃຊ້ເພື່ອສະໜອງທຶນໃຫ້ແກ່ໂຄງການທີ່ສະຫຼັບຊັບຊ້ອນ ຫຼື ທາງດ້ານເຕັກນິກເຊັ່ນ: ໂຄງສ້າງພື້ນຖານໂຄງລ່າງ ສີຂຽວ, ພະລັງງານໝູນວຽນ ແລະ ການພັດທະນາເມືອງອັດສະລິຍະ.

ເງື່ອນໄຂການເປີດໃຊ້ງານ ແລະ ການພິຈາລະນາທີ່ສຳຄັນ

• ສອດຄ່ອງກັບເງື່ອນໄຂການມີສິດໄດ້ຮັບ. ໂຄງການທີ່ກຳລັງຊອກຫາທຶນຕ້ອງສອດຄ່ອງກັບຄວາມຕ້ອງການສະເພາະຢ່າງໃກ້ສິດ, ຈຸດປະສົງ ແລະ ບູລິມະສິດຂອງແຕ່ລະກອງທຶນ. ເຊິ່ງກ່ຽວຂ້ອງກັບຄວາມເຂົ້າໃຈຢ່າງລະອຽດກ່ຽວກັບຂົງເຂດທີ່ກອງທຶນແນໃສ່, ພາກພື້ນເປົ້າໝາຍ ແລະ ຜົນໄດ້ຮັບທີ່ໄດ້ຕັ້ງໃຈໄວ້. ໂຄງການຕ່າງໆຈະຕ້ອງສະແດງໃຫ້ເຫັນຜົນກະທົບທີ່ຊັດເຈນໂດຍຜ່ານທາງໂຄງການຈຶ່ງຈະມີສິດໄດ້ຮັບ ທຶນ. ກອບ ແລະ ຕົວຊີ້ວັດການປະເມີນຜົນກະທົບຄວນຖືກລວມເຂົ້າໃນການວາງແຜນ ແລະ ການດໍາເນີນໂຄງການ.

ສິ່ງທ້າທາຍທີ່ອາດຈະເກີດຂຶ້ນ

• ການເຂົ້າເຖິງເງິນທຶນມັກຈະມີການແຂ່ງຂັນ. ຂະບວນການສະໝັກເພື່ອເຂົ້າເຖິງກອງທຶນເຫຼົ່ານີ້ອາດແກ່ຍາວ, ເປັນລະບົບທາງລັດຖະການ ແລະ ສະຫຼັບຊັບຊ້ອນ. ການປະຕິບັດການຫຼາຍຂັ້ນຕອນຂອງການອະນຸມັດ, ຂໍ້ກໍານົດການປະຕິບັດຕາມ ແລະ ເອກະສານປະກອບຫຼາຍ ຂັ້ນຕອນສາມາດສ້າງສິ່ງທ້າທາຍທີ່ສໍາຄັນສໍາລັບຜູ້ມີໂອກາດໄດ້ສະຫມັກ, ໂດຍສະເພາະແມ່ນ ອົງການຈັດຕັ້ງຂະໜາດນ້ອຍກວ່າ ຫຼື ລັດຖະບານທ້ອງຖິ່ນທີ່ມີຊັບພະຍາກອນ ແລະ ຄວາມຊໍານານຈໍາກັດ. ເນື່ອງຈາກການມີຄວາມພ້ອມດ້ານເງິນທຶນຈໍາກັດ, ການແຂ່ງຂັນອາດຈະຮຸນແຮງ, ໂດຍມີຂໍ້ສະເໜີຈໍານວນຫຼາຍທີ່ຈະແຂ່ງຂັນແຍ້ງຊິງເອົາຊັບພະຍາກອນທີ່ຈໍາກັດ.
• ຜູ້ຮັບອາດຈະປະເຊີນກັບສິ່ງທ້າທາຍໃນການປະຕິບັດຕາມມາດຕະຖານການຕິດຕາມ ແລະ ການປະເມີນຜົນ. ຜູ້ຮັບທີ່ໄດ້ຮັບເງິນທຶນຈາກ ການຊ່ວຍເຫຼືອດ້ານເຕັກນິກວິຊາການອາດຈະຕ້ອງປະຕິບັດຕາມຂໍ້ກໍານົດການລາຍງານ ແລະ ຄວາມຮັບຜິດຊອບທີ່ເຂັ້ມງວດລວມທັງການຕິດຕາມ ແລະ ການປະເມີນຜົນໄດ້ຮັບຂອງໂຄງການ ແລະ ຜົນກະທົບຕໍ່ສິ່ງແວດລ້ອມ, ເພີ່ມພາລະການບໍລິຫານຈັດການ ແລະ ຄ່າໃຊ້ຈ່າຍໃນການປະຕິບັດຕາມຂໍ້ກໍານົດ.
• ຜູ້ຮັບອາດຈະປະເຊີນກັບສິ່ງທ້າທາຍໃນການຈັດຕັ້ງປະຕິບັດ. ຜູ້​ຮັບ​ທຶນ​ຈະ​ຕ້ອງກວດສອບໃຫ້ແນ່ໃຈວ່າມີການປະສານງານທີ່ມີປະສິດ ທິພາບລະຫວ່າງໜ່ວຍງານພາກລັດ, ຕົວແທນບໍລິສັດ ​ແລະ ພາກສ່ວນ​ກ່ຽວຂ້ອງ​ພາຍ​ນອກ​ເພື່ອ​ໃຫ້​ການ​ດໍາເນີນງານປະສົບຜົນ​ສຳ​ເລັດ​. ເຖິງຢ່າງໃດກໍ່ຕາມ, ສິ່ງນີ້ອາດພິສູດໄດ້ວ່າມີຄວາມທ້າທາຍໂດຍສະເພາະຢ່າງຍິ່ງສໍາລັບໂຄງການເມືອງອັດສະລິຍະທີ່ສະຫຼັບຊັບຊ້ອນ ແລະ ມີຂະຫນາດໃຫຍ່.

ຜົນປະໂຫຍດທີ່ອາດຈະເກີດຂຶ້ນ

• ເງິນທຶນຊ່ວຍເຫຼືອສະໜັບສະໜູນການພັດທະນາແບບຍືນຍົງ. ກອງທຶນເຫຼົ່ານີ້ສະໜອງແຫຼ່ງການເງິນທີ່ຈຳເປັນຫຼາຍເພື່ອສະໜັບສະໜູນການພັດທະນາຕົວເມືອງອັດສະລິຍະ ແລະ ໂຄງການໂຄງສ້າງພື້ນ ຖານໂຄງລ່າງທີ່ສຳຄັນໃນກຸ່ມປະເທດສະມາຊິກອາຊ່ຽນ (ASEAN). ເງິນທຶນເຫຼົ່ານີ້ສາມາດນຳໄປໃຊ້ໄດ້ຫຼາຍຈຸດປະສົງ, ລວມທັງການ ພັດທະນາໂຄງສ້າງພື້ນຖານໂຄງລ່າງສີຂຽວ ແລະ ການສ້າງຂີດຄວາມສາມາດ.
• ເງິນທຶນຊ່ວຍເຫຼືອສາມາດສະໜອງການສະໜັບສະໜູນຄວາມສາມາດທາງດ້ານເຕັກນິກວິຊາການ. ນອກຈາກການສະໜອງທຶນແລ້ວ, ການຊ່ວຍເຫຼືອທາງດ້ານເຕັກນິກວິຊາການຍັງຊ່ວຍສ້າງຂີດຄວາມສາມາດ ແລະ ການບໍລິການໃຫ້ຄໍາປຶກສາແກ່ຜູ້ຮັບອີກດ້ວຍເຊິ່ງຈະຊ່ວຍ ເສີມສ້າງຂີດຄວາມສາມາດຂອງສະຖາບັນ ແລະ ປັບປຸງໂອກາດທີ່ຈະປະສົບຄວາມສໍາເລັດຂອງໂຄງການທີ່ໄດ້ຮັບການສະໜັບສະໜູນ ທາງການເງິນ. ທຶນຊ່ວຍເຫຼືອເຫຼົ່ານີ້ສະໜອງທຶນໃນການຝຶກອົບຮົມ ແລະ ການສຶກສາ, ຊ່ວຍເຫຼືອພະນັກງານ, ນັກວາງແຜນ ແລະ ພາກສ່ວນກ່ຽວຂ້ອງທ້ອງຖິ່ນພັດທະນາທັກສະ ແລະ ຄວາມຮູ້ທີ່ຈໍາເປັນໃນການດໍາເນີນການ ແລະ ຄຸ້ມຄອງໂຄງການຢ່າງມີປະສິດທິພາບ.

ແຫຼ່ງຂໍ້ມູນ/ຂໍ້ມູນຂ່າວສານເພີ່ມເຕີມ

• ທະນາຄານພັດທະນາອາຊີ (n.d.). ການຊ່ວຍເຫຼືອດ້ານເຕັກນິກວິຊາການຂອງ ທະນາຄານພັດທະນາອາຊີ ADB (TA) ແມ່ນຫຍັງ? ສາມາດເຂົ້າເບິ່ງຂໍ້ມູນໄດ້ທີ່: https://www.adb.org/business/how-to/technical-assistance
• ທະນາຄານໂລກ (n.d.). ໂຄງການຄວາມຮ່ວມມືຕົວເມືອງອັດສະລິຍະລະດັບໂລກ.  ສາມາດເຂົ້າເບິ່ງຂໍ້ມູນໄດ້ທີ່:  https://www.worldbank.org/en/programs/global-smart-city-partnership-program/partners
• ທະນາຄານພັດທະນາອາຊີ (n.d.). ກອງທຶນພິເສດຊ່ວຍເຫຼືອດ້ານເຕັກນິກວິຊາການ. ສາມາດເຂົ້າເບິ່ງຂໍ້ມູນໄດ້ທີ່: https://www.adb.org/what-we-do/funds/technical-assistance-special-fund
• ກອງທຶນການລົງທຶນດ້ານສະພາບອາກາດ (n.d.). ກອງທຶນເຕັກໂນໂລຊີສະອາດ. ສາມາດເຂົ້າເບິ່ງຂໍ້ມູນໄດ້ທີ່: https://www.cif.org/topics/clean-technologies
• ທະນາຄານການລົງທຶນເອີຣົບ (n.d.). ສະພາບອາກາດ ແລະ ຄວາມຍືນຍົງທາງດ້ານສິ່ງແວດລ້ອມ. ສາມາດເຂົ້າເບິ່ງຂໍ້ມູນໄດ້ທີ່:  https://www.eib.org/en/projects/topics/climate-action/get-support