ຄຳອະທິບາຍ
ນີ້ໝາຍເຖິງການຈັດສັນເງິນທຶນຈາກງົບປະມານແຫ່ງຊາດ ຫຼື ງົບປະມານຂອງພາກລັດ ເພື່ອສະໜັບສະໜູນການພັດທະນາໂຄງການເມືອງອັດສະລິຍະ ແລະ ເປັນຮູບແບບການລະດົມທຶນທີ່ນຳໃຊ້ຫຼາຍທີ່ສຸດສຳລັບໂຄງການເມືອງອັດສະລິຍະ ໃນອາຊຽນ (ASEAN).
ເງື່ອນໄຂການເປີດໃຊ້ງານ ແລະ ການພິຈາລະນາທີ່ສຳຄັນ
- ລະບົບການຄຸ້ມຄອງການເງິນສາທາລະນະ ແລະ ພື້ນຖານໂຄງລ່າງທີ່ເຂັ້ມແຂງ ແລະ ໂປ່ງໃສ. ລະບົບການຄຸ້ມຄອງການເງິນສາທາລະນະທີ່ເຂັ້ມແຂງສະແດງໃຫ້ເຫັນເຖິງຄວາມໂປ່ງໃສ ແລະ ຄວາມຮັບຜິດຊອບໃນການກໍານົດງົບປະມານ, ການວາງແຜນ ແລະ ໂຄງການໃນບັນດາຂົງເຂດອື່ນໆ, ຖືວ່າເປັນສິ່ງສໍາຄັນຕໍ່ການເພີ່ມປະສິດທິພາບ ແລະ ຄວາມສົມບູນຂອງການໃຊ້ຈ່າຍ ແລະ ການລົງທຶນຂອງພາກລັດ. ການຄົ້ນຄວ້າຂອງ IMF ເຜີຍໃຫ້ເຫັນວ່າ ໂດຍສະເລ່ຍປະເທດໜຶ່ງສູນເສຍມູນຄ່າການລົງທຶນສາທາລະນະສູງເຖິງ 30% ຍ້ອນຄວາມບໍ່ມີປະສິດທິພາບໃນຂະບວນການລົງທຶນສາທາລະນະ ແລະ ເກືອບເຄິ່ງໜຶ່ງຂອງການສູນເສຍເຫຼົ່ານີ້ສາມາດຊົດເຊີຍໄດ້ໂດຍຜ່ານການຄຸ້ມຄອງພື້ນຖານໂຄງລ່າງທີ່ເຂັ້ມແຂງ.
ສິ່ງທ້າທາຍທີ່ອາດຈະເກີດຂຶ້ນ
- ໂຄງການເມືອງອັດສະລິຍະບໍ່ໄດ້ສອດຄ່ອງກັບລຳດັບຄວາມສຳຄັນຂອງຊາດສະເໝີໄປ. ໂຄງການເມືອງອັດສະລິຍະມັກຈະບໍ່ໄດ້ຮັບເງິນທຶນທີ່ເຂົາເຈົ້າຕ້ອງການໃນດ້ານການນຳໃຊ້ງານສະເພາະ, ຍ້ອນວ່າສິ່ງເຫຼົ່ານີ້ອາດຈະບໍ່ສອດຄ່ອງກັບລຳດັບຄວາມສຳຄັນງົບປະມານແຫ່ງຊາດ ຫຼື ຂອງລັດໃນປະຈຸບັນ. ຍົກຕົວຢ່າງ: ໂຄງການເມືອງອັດສະລິຍະ ບາງໂຄງການອາດຕ້ອງມີ ການລົງທຶນທີ່ສຸມໃສ່ການດູແລສຸຂະພາບ, ແຕ່ລຳດັບຄວາມສຳຄັນຂອງລັດຖະບານກາງສໍາລັບວົງຈອນງົບປະມານອາດຈະເລືອກທີ່ຈະສຸມໃສ່ການສ້າງພື້ນຖານໂຄງລ່າງທີ່ກວ້າງຂວາງທົ່ວປະເທດ (ເຊັ່ນ: ໂຄງສ້າງພື້ນຖານດ້ານຄົມມະນາຄົມຂົນສົ່ງ) ແລະ ຈະເປັນເລື່ອງຍາກສຳລັບເມືອງທີ່ຈະຫາເງິນທຶນສຳລັບໂຄງການດ້ານການດູແລສະຂະພາບ. ການລະດົມທຶນໃຫ້ແກ່ໂຄງການເມືອງອັດສະລິຍະ ມີແນວໂນ້ມທີ່ຈະເປັນສິ່ງທ້າທາຍຫຼາຍຂຶ້ນສຳລັບບັນດາເມືອງທີ່ບໍ່ມີນະໂຍບາຍແຫ່ງຊາດກ່ຽວກັບເມືອງອັດສະລິຍະ ແລະ ສະນັ້ນ, ຈຶ່ງບໍ່ມີຄໍາສັ່ງແຫ່ງຊາດໃນການຈັດສັນເງິນທຶນຈາກໂຄງການເມືອງອັດສະລິຍະໂດຍງົບປະມານແຫ່ງຊາດ.
- ມີແຫຼ່ງທຶນທີ່ຈໍາກັດແຕ່ຊັບພະຍາກອນກໍ່ມີລະດັບຄວາມສຳຄັນທີ່ການແຂ່ງຂັນກັນ. ປະລິມານເງິນທຶນທີ່ມີຢູ່ອາດຈະບໍ່ພຽງພໍກັບຄວາມຕ້ອງການຂອງໂຄງການເມືອງອັດສະລິຍະ, ໂດຍສະເພາະຢ່າງຍິ່ງເມື່ອລັດຖະບານມີຄວາມຕ້ອງການເງິນທຶນດ້ານພື້ນຖານໂຄງລ່າງທີ່ຮີບດ່ວນອື່ນໆ.
- ຂະບວນການຈັດຫາງົບປະມານທີ່ຊັບຊ້ອນ ຫຼື ຈຳກັດອາດຈະເຮັດໃຫ້ການລະດົມທຶນຊັກຊ້າ. ຂະບວນການອະນຸມັດງົບປະມານອາດຈະໃຊ້ເວລາດົນນານ ແລະ ຊັບຊ້ອນ ແລະ ຕ້ອງໄດ້ຮັບຄວາມເຫັນດີເຫັນພ້ອມຈາກໜ່ວຍງານລັດຖະບານຫຼາຍໜ່ວຍງານທັງລະດັບຊາດ ແລະ ລະດັບແຂວງຕື່ມອີກ. ສິ່ງນີ້ສາມາດສົ່ງຜົນໃຫ້ເກີດຄວາມຊັກຊ້າໃນການເລີ່ມຕົ້ນໂຄງການ ແລະ ຍັງເຮັດໃຫ້ການຈ່າຍເງິນໃຫ້ກັບຜູ້ຮັບເໝົາ ແລະ ພະນັກງານຊັກຊ້ານໍາອີກ. ນອກຈາກນັ້ນ, ລັດຖະບານກາງອາດຈະລວມເອົາຄໍາເຕືອນໄວ້ໃນຂໍ້ຕົກລົງການລະດົມຈັດຫາທຶນທີ່ກໍານົດຂໍ້ຈໍາກັດກ່ຽວກັບງົບປະມານທີ່ເບີກຈ່າຍເມື່ອເກີດຄວາມຜິດດ່ຽງຈາກແຜນການເດີມທີ່ໄດ້ຮັບການອະນຸມັດ (ເຊັ່ນ: ການເພີ່ມຂອບເຂດໃໝ່ ຫຼື ການປ່ຽນແປງປະເພດຂອງເຕັກໂນໂລຢີທີ່ໃຊ້), ນີ້ອາດຈະເຮັດໃຫ້ເກີດຄວາມຊັກຊ້າໃນເງິນເບີກຖອນທຶນ, ຖືກຖອນອອກ ຫຼື ມີຄວາມປ່ຽນແປງໃນການດໍາເນີນໂຄງການໃນລະດັບສູງ.
- ຂາດສັກກະຍະພາບໃນການວາງແຜນໂຄງການ ແລະ ຄວາມສາມາດໃນການຄຸ້ມຄອງໃນພາກລັດ. ໂຄງການເມືອງອັດສະລິຍະ ອາດຈະຊັບຊ້ອນ ແລະ ຄັດກັບບັນດາໜ່ວຍງານ ຫຼື ພາກສ່ວນການຕ່າງໆ, ສະນັ້ນ ເຈົ້າໜ້າທີ່ພາກລັດຈຶ່ງຈໍາເປັນຕ້ອງມີຄວາມສາມາດທາງດ້ານເຕັກນິກ, ກົດໝາຍ ແລະການເງິນທີ່ເຂັ້ມແຂງເພື່ອວາງແຜນ ແລະ ຄຸ້ມຄອງໂຄງການເຫຼົ່ານີ້. ໂຄງການທີ່ຖືກອອກແບບ ແລະ ຄຸ້ມຄອງບໍ່ດີອາດຈະເຮັດໃຫ້ຕົ້ນທຶນເກີນດູນ ຫຼື ບໍ່ສາມາດສົ່ງມອບວຽກໄດ້.
ຜົນປະໂຫຍດທີ່ອາດເກີດຂຶ້ນ
- ຊ່ອງທາງທີ່ກົງໄປກົງມາໃນການໄດ້ຮັບທຶນທີ່ຈໍາເປັນ. ຖ້າວ່າມີການເງິນແຫ່ງຊາດ ແລະ ສາມາດເບີກໃຊ້ໄດ້ໂດຍບໍ່ມີອຸປະສັກສໍາຄັນໃນລະບົບທາງລັດຖະການຫຼາຍ, ນີ້ສາມາດເປັນວິທີການທີ່ວ່ອງໄວ ແລະ ງ່າຍດາຍໃນການສະໜັບສະໜູນໂຄງການເມືອງອັດສະລິຍະໄດ້.
ແຫຼ່ງຂໍ້ມູນ/ຂໍ້ມູນຂ່າວສານເພີ່ມເຕີມ
- ທະນາຄານ ພັດທະນາອາຊີ (ADB) (2023). ການຟື້ນຟູວິທີການຈັດຫາເງິນທຶນສຳລັບການສ້າງພື້ນຖານໂຄງລ່າງແບບຍືນຍົງ ແລະ ຢືດຢຸ່ນໃນອາຊຽນ ASEAN +3. ສາມາດເຂົ້າເບິ່ງຂໍ້ມູນໄດ້ທີ່: https://www.adb.org/sites/default/files/publication/879411/financing-sustainable-resilient-infrastructure-asean3.pdf
- IMF Blog (2020). ການຄຸ້ມຄອງພື້ນຖານໂຄງລ່າງທີ່ເຂັ້ມແຂງສາມາດຢຸດຕິຄວາມສິ້ນເປືອງໃນການລົງທຶນສາທາລະນະໄດ້ແນວໃດ. ສາມາດເຂົ້າເບິ່ງຂໍ້ມູນໄດ້ທີ່: https://blogs.imf.org/2020/09/03/how-strong-infrastructure-governance-can-end-waste-in-public-investment/
- ທະນາຄານໂລກ (2020). ການຄຸ້ມຄອງພື້ນຖານໂຄງລ່າງ. ສາມາດເຂົ້າເບິ່ງຂໍ້ມູນໄດ້ທີ່: https://thedocs.worldbank.org/en/doc/96550c14d62154355b6edc367d4d7f33-0080012021/original/Infrastructure-Governance-Assessment-Framework-December-2020.pdf